एखाद्याचे आगमन हे सहसा आनंददायी असते आणि त्याच्या स्वागताची तयारीही मोठ्या प्रमाणावर केली जाते. आता कोण येणार आणि त्याची तयारी कशी करणार हा वेगळा विषय आहे. सध्या आपण रमजानबद्दल बोलत आहोत आणि त्याचे आगमन केवळ मुस्लिमांसाठीच नाही तर मुस्लिम समाजाव्यतिरिक्त जगातील प्रत्येकासाठी एक अतिशय चांगली आणि धन्य करणारी बातमी आहे.
अरबी कॅलेंडर प्रमाणे बारा महिन्यांच्या यादीत रमजान हा नववा महिना. रमजान महिना म्हणजे कुरआन, धर्मपरायणता, संयम, करुणा, दया, प्रेम आणि आपुलकी, परोपकार, मानवजातीची सेवा, अल्लाहच्या मार्गात स्थिरता, एकात्मता आणि एकतेच्या भावनेचा प्रकटीकरणाचा महिना. अल्लाह आणि त्याच्या प्रेषितांचे अंतहीन गुणगान करण्याचा महिना.
या महिन्याची बरकत प्राप्त करण्यासाठी, काही गुणांची आवश्यकता असते. ते गुण विकसित करण्यासाठी आपणा स्वतःला तयार व्हावे लागेल. आपल्याला माहीत आहे की रमजानमध्ये कुरआनचे अवतरण झाले, रोजे अनिवार्य झाले, बदरची लढाई झाली, शबे कद्र साजरी झाली, मक्का जिंकला गेला, त्यामुळे या महिन्याला विशेष महत्त्व दिले जाते. मग या महिन्यात जकात, इनफाक आणि सदका यांचे मोठ्या प्रमाणावर दान केले जाते. रमजान महिन्यात उपासनेची पातळी मोठ्या प्रमाणात वाढलेली असते. या महिन्याचे आपण योग्य सन्मानाने स्वागत करणे महत्त्वाचे आहे. रमजानच्या आगमनापूर्वी, त्यासाठी आपण आंतरिक आणि बाह्यस्व तयार होऊ या. रमजान कुरआनच्या अवतरणाचा महिना आहे. त्यामुळे या महिन्यात जास्तीत जास्त कुरआनचे पठण करण्याचे नियोजन करावे. केवळ अरबी भाषेत कुरआनचे पठण न करता त्याचा आपल्या मातृभाषेतील अनुवाद वाचावा, तो समजून घ्यावा, तो आचरणात आणावा व इतरांनाही तो समजावून सांगावा.
दृढ निश्चय करावे की, खोटे बोलणार नाही, भांडण करणार नाही, कोणाला त्रास देणार नाही, शिवीगाळ करणार नाही. कोणी भांडायला आला, शिवीगाळ करू लागला तर उत्तरादाखल एवढेच म्हणावे ’बाबारे! माझा रोजा आहे!’ कोणाशी हुज्जत घालू नये. शेजाऱ्यांची काळजी घ्यावी. त्यांचे मन दुखवू नये. शेजाऱ्यांना त्रास देऊ नये. इफ्तारच्या वेळी त्यांना विसरू नये.
रात्री तरावीहच्या नमाजनंतर विनाकारण बाहेर फिरू नये. रात्री उशिरापर्यंत जागरण केल्याने पहाटे सहरीला जागे होणे कठीण जाते. रात्री वेळेवर झोपण्याचे व पहाटे लवकर जागे होण्याचे नियोजन करावे. त्यामुळे तहाज्जुदची नमाज पठण करणे सुलभ होईल. हा बरकत देणारा महिना आहे. या महिन्यात उपजीविका वाढविली जाते. चला तर मग, रमजानचे स्वागत करण्यासाठी आपण सारे सज्ज होऊ या!
- सय्यद झाकीर अली, परभणी.
मो.9028065881
Post a Comment