एकमेव ईशग्रंथ जो आजही सुरक्षित आहे

‘‘रमजान महिन्यामध्ये कुरआनचे अवतरण झाले मानव जातीकरिता मार्गदर्शन व मार्गदर्शनाच्या सुस्पष्ट पुराव्यांनी समाविष्ट सत्य व असत्याची कसोटी...’’(दिव्यकुरान 2:185)

रमजान एक पवित्र महिना आहे .रमजान आणि कुरआन संपूर्ण मानवजातीसाठी अल्लाहचा एक वरदान आहे. मानवाने जीवन कसे जगावे याचे मार्गदर्शन कुरआनात आहे. हा इशग्रंथ सत्य आणि असत्याची कसोटी आहे. मुस्लिम समुदाय रमजान महिन्याला पवित्र मानतो याचे मुख्य कारण असे की या महिन्यामध्ये कुरआन प्रेषित मुहम्मद (सल्ल.) यांचेवर अवतरीत झाला. अल्लाहने प्रेषितांवर हा कुरआन 23 वर्षात थोडे थोडे करून अवतरित केलेला आहे .हा कुरआन ईशवाणी आहे. याचे लेखक मुहम्मद पैगंबर (सल्ल.) नाहीत. अल्लाहने प्रेषितांची श्रृंखला बंद केलेली आहे. या भूतलावर आता कोणतेच प्रेषित येणार नाहीत. प्रेषित मुहम्मद(स. अ) हे अल्लाहचे अंतिम पैगंबर आहेत. आता कोणतेच दुसरे ग्रंथ किंवा मार्गदर्शक अल्लाहकडून येणार नाहीत. म्हणून संपूर्ण मानवजातीचा मार्गदर्शक फक्त आणि फक्त कुरआन आहे. म्हणून कुरआनचे रक्षण होणे गरजेचे होते. कुरआन सुरक्षित राहिला  पाहिजे याची जबाबदारी अल्लाहने स्वतः घेतलेली आहे. कुरआनमध्ये कुणी फेरफार करू शकत नाही कमी किंवा जास्त करू शकत नाही. अल्लाह कुरआनमध्ये घोषित करतो की, ‘‘उरले हे स्मरण (कुरआन) तर हे आम्ही अवतरले आहे आणि आम्ही स्वतः याचे संरक्षक आहोत.’’(15:9)

प्रेषितांवर कुरआन अवतरीत झाल्यापासून आज पर्यंत म्हणजेच 1445 वर्षांत कुरआन तसाच आहे जसा प्रेषितांच्या काळात होता. याचा पुरावा कुरआनचे विरोधक देखील देतात. फिलीप के हट्टी जे कुरआनचे कट्टर विरोधक मानले जातात ते कुरआनबद्दल आपले विचार असे प्रकट करतात की, ’’आधुनिक टीकाकार या गोष्टींवर सहमती दर्शवितात की सध्याच्या कुरआनच्या प्रती ठीक त्याच कुरआनच्या प्रती एकरुप  आहेत ज्याला झैद बिन हारीसने(रजी.) स्वतः आपल्या हातांनी लिहिले होते आणि हे की आजचा कुरआन तोच कुरआन आहे ज्याला प्रेषित मुहम्मद (स.) सादर केले होते’’. जैद बिन हारिस(रजी.) कातीब (कुरआन लिहिणारे) होते जेव्हा अल्लाहकडून प्रेषितांवर कुरआन अवतरीत व्हायचा तेव्हा प्रेषितांच्या सहमतीने ते कुरआनच्या आयातींना लिहून ठेवायचे. पॅरिसची एक संस्था आहे ज्याने कुरआनच्या 42 हजार प्रति जगभरातील विविध प्रांत व राष्ट्रांतून जमा केल्या आणि त्यावर बारकाईने अभ्यास केला तर त्यांना थोड्याफार व्याकरणाच्या चुकांव्यतिरिक्त कोणत्याच चुका आढळल्या नाहीत.

आठव्या शतकात एक यहुदी होता. तो काळ खलीफा मामून रशीद चा होता त्या यहुदीला शुद्ध लेखनावर प्रभुत्व होते त्याने बायबलमध्ये फेरफार करून बायबलच्या काही प्रति शुद्धलेखनाने स्वतः लिहिले आणि एका चर्चेमध्ये  त्या प्रती घेऊन गेला तिथल्या पादरींनी  लिहिलेले ते ग्रंथ स्वीकारले. याच प्रकारे तौरातदेखील लिहिला, लोकांनी त्या प्रती स्वीकारल्या. आता त्याने कुरआनच्या काही प्रती फेरफार करून स्वतः सुलेखनातून लिहिल्या व त्या प्रती त्याने काही मुसलमानांना दिल्या त्या लोकांनी जेव्हा त्या प्रतींचे वाचन केले तर त्यांना त्याच्यात बऱ्याच चुका आढळल्या तर त्या मुसलमानांनी त्या प्रती फेकून दिल्या. सांगायचे तात्पर्य असे की कुरआनात फेरबदल किंवा फेरफार झालेली नाही याचे पुरावे कुरआनचे विरोधक कट्टर विरोधक देखील देतात.

कुरआन सुरक्षित आहे कारण की,

1. अल्लाहने कुरआनचे संरक्षण करण्याचे वचन कुरानात दिलेले आहे. 

2. कुरआन अरबी भाषेत अवतारित झालेला आहेत आणि अरबी भाषा जशी आज बोलली लिहिली वाचली आणि समजली जाते त्याच तऱ्हेने जेव्हा कुरआन प्रेषितांवर अवतरित झाला होता बोलली लिहिली वाचली आणि समजली जायची. याच्या विपरीत इतर भाषांमध्ये काळानुसार बदल होत असतो. हजार वर्षात भाषेत बदल होत असतो याचे पुरावे आहेत. आज जशी उर्दू बोलली लिहिली  जाते पूर्वी तशी वाचली बोलली  जात नसे. अरबी भाषेबद्दल असं नाही अरबी भाषा प्रेषित मुहम्मद (स.) च्या काळात जशी होती तशीच आज आहे हा ईश्वराचा एक आविष्कार आहे.

3. कुरआनचे हाफीज (कुरआन स्मरण करणारे) प्रेषित मुहम्मद (स.) यांच्या काळातही होते आणि आज देखील संपूर्ण विश्वात लाखोंच्या संख्येने असे हाफीज आहेत ज्यांना कुरआन तोंडपाठ आहे. जगातील इतर कोणत्या ग्रंथाला हा बहुमान प्राप्त नाही की ज्याला लाखोंच्या संख्येने  मुखोद्गत करणारे आहेत.

4. दरवर्षी मदरशांमधून कुरआनचे विद्यार्थी लाखोंच्या संख्येने कुरआन मुखोद्गत करतात. असे विद्यार्थी देखील आहेत जे पाच ते दहा वयोगटातील आहेत आणि कुरआनला स्मरण करून टाकतात.

5. रमजानमध्ये लाखो हाफीज तरावीहच्या नमाजमध्ये कुरआनची तिलावत करतात.

6. मकतबमध्ये कोटींच्या संख्येत असे विद्यार्थी शिक्षण घेत असतात जे कुरआनला तोंडपाठ करण्याचे प्रयत्न करतात व काही प्रमाणात यशस्वी देखील होतात.

7. दिवसात पाच वेळा नमाज अदा केली जाते नमाजात देखील कोटींच्या संख्येने श्रद्धावंत कुरआनचे पठण करतात.

8. किरात (कुरआनच्या सुवाचना) च्या स्पर्धा जगभरात आयोजित  केल्या जातात. ज्यामध्ये कित्येक  हाफीज कुरआनचे तोंडी पठण करतात. 

9. धार्मिक कार्यक्रमात श्रद्धावंत कुरआनच्या पठनाने कार्यक्रमाचे उद्घाटन करतात.

10. जगात कित्येक वेबसाईट्स अशा आहेत ज्यामध्ये कुरआन सुरक्षित सेव्ह केलेला आहे याचा वापर करणारे कोटींच्या संख्येत आहेत. 

           यावरून असे सिद्ध होते की कुरआन हा ईशग्रंथ आहे. सुरक्षित आहे. त्याच्यात तिळमात्र बदल झालेला नाही आणि कुणी कुरआनात फेरफार करू शकत नाही. कुरआनवर श्रद्धा बाळगणारे या जीवनात आणि मरणोत्तर जीवनात देखील यशस्वी होणार आहेत. कुरआनाची सुरक्षितता आणि रमजानची पवित्रता संपूर्ण मानवजातीला आवाहन करते की सर्वांनी कुरआनला गांभीर्याने घ्यावे. जीवनात एकदा तरी संपूर्ण कुरआन समजून वाचावे. हे माहीत करून घ्यावे की कुरआनची शिकवण काय आहे. तर चला असे संकल्प घेऊ की या पवित्र रमजान महिन्यात कुरआनचे पठण निश्चितच करू. अल्लाह आम्हा सर्वांना कुरआनचे महत्त्व समजण्यास मदत करो हीच अल्लाह दरबारी प्रार्थना करतो.

- आसिफ खान, 

धामणगाव बढे

9405932295