सावधान! महाभयंकर भूकंप येतोय

माणसाने सृष्टीची रचना, व्यवस्था व त्यातील रहस्ये जाणून घेण्याचा सतत प्रयत्न केला आणि बरीच माहिती मिळवली. याविषयी त्याच्या मनात एक प्रश्न हाही निर्माण होत राहिला की सृष्टीची ही व्यवस्था कायमस्वरूपी आहे की तात्पुरती? म्हणजे सृष्टीचा हा गाडा पुढेही असाच निरंतर चालत राहणार की भविष्यात कधी बंद पडणार? आणि जर या सृष्टीचा अंत होणे निश्चित असेल तर त्याचे स्वरूप काय असेल? 

निसर्गकर्त्याने या संदर्भातही मानवजातीला पुर्णपणे मार्गदर्शन केले आहे. कुरआनमध्ये याविषयी सांगितले गेले आहे की या जगाचे अस्तित्व हे कायम टिकणारे नाही. एक वेळ येईल जेव्हा हे नष्ट होईल. ते कसे होईल? त्याचीही तपशीलवार माहिती देण्यात आली आहे आणि त्यानंतर पुढे काय काय होईल? यावरही प्रकाश टाकण्यात आला आहे. जगाचा अंत, ज्याला कयामत किंवा न्यायाचा दिवस म्हणतात, तो कसा असेल? त्याचे प्राथमिक चित्र समोर ठेवताना पवित्र कुरआनमध्ये म्हटले गेले आहे,

’या अय्युहन्नासुत्तकू रब्ब-कुम, इन्-न जल्-जलतस्-साअति शयउन अजीमुन.’

अनुवाद :- लोकहो! आपल्या पालनकर्त्याचे भय बाळगा, निश्चितच कयामतचा भूकंप महाभयंकर गोष्ट आहे. (22 अल्-हज्ज : 1 )

या आयतीमध्ये कयामतच्या दिवशी सर्वाधिक तीव्रतेने येणाऱ्या भूकंपाचा उल्लेख आहे, जो कयामतच्या सुरुवातीचा एक टप्पा आहे. जेव्हा ती भयंकर वेळ येईल, तेव्हा त्याचे पहिले चिन्ह हे असेल की पृथ्वी ज्या दिशेने फिरत आहे ती दिशा उलट होईल आणि त्यामुळे लोकांना सूर्य पूर्वेऐवजी पश्चिमेकडून उगवताना दिसेल. पृथ्वी थरथरायला लागेल. त्यावेळी तीची अवस्था खवळलेल्या समुद्रातील जोरदार लाटा एखाद्या बोटीला धडकल्याने होते तशी होईल, किंवा वादळी वाऱ्यात हेलकावे खात असलेल्या कंदीलाप्रमाणे होईल. पवित्र कुरआनमध्ये अनेक ठिकाणी त्या परिस्थितीचे वर्णन करण्यात आले आहे. भूकंपाच्या जोरदार धक्क्यामुळे पृथ्वीचा फक्त काही भागच नाही किंवा एखादा देश-प्रदेशच नाही तर संपूर्ण पृथ्वी हादरून जाईल. पृथ्वी व पर्वतांना उचलून एकाच प्रहारात चक्काचूर केले जाईल. तो प्रसंग इतका भयावह असेल की जेव्हा तो भूकंप येईल तेव्हा आपल्या बाळांना दूध पाजणाऱ्या माता त्यांना सोडून पळायला लागतील. आपल्या बाळाचे काय होईल याची जाणीव कोणत्याही आईला राहणार नाही. 

साधारणपणे 6 ते 8 तीव्रतेच्या भूकंपांमुळे खूप विनाश होतो. किल्लारीचा भूकंप 6.4 इतक्या तीव्रतेचा असल्याची माहिती मिळते. ज्यामुळे होत्याचं नव्हतं झालं. अनेकदा हा प्रश्न विचारला जातो की 10 रिश्टर स्केलचा भूकंप कधी येऊ शकतो का? असे कधी घडले तर काय होईल? कयामतच्या दिवशी होणारा भूकंप किती रिश्तर स्केलचा असेल? हे सांगण्यासाठी आज कोणतेही उदाहरण देता येणार नाही. एक मात्र नक्की की त्या भूकंपाची तीव्रता इतकी असेल की पृथ्वीच्या आत दडलेली सर्व मौल्यवान खनिजे, खजिने आणि साठे पृथ्वीबाहेर फेकले जातील. ज्यांना आज खूप महत्व आहे पण त्या वेळेस त्यांची किंमत कवडीचीही राहणार नाही. त्या वेळी ती सर्व संपत्ती व संसाधने निरुपयोगी ठरतील जी प्राप्त करण्यासाठी आज कमजोर देशांना उध्वस्त केले जात आहे आणि ज्यांवर कब्जा करण्यासाठी आपल्यासारख्याच माणसांचे रक्त निर्दयतेने सांडले जात आहे.

कयामतचा दिवस किती भयानक असेल हे वर्णन करताना कुरआनमध्ये म्हटले गेले आहे की एक आईही आपल्या दुधपित्या बाळाला विसरून जाईल. ममता ही आईची सर्वात प्रबळ भावना आहे. ही भावना आपल्या मुलांवर असलेल्या प्रेमाचे दुसरे नाव आहे. आपण पाहतो की काही कामानिमित्त बाहेर पडणारी माता जेव्हा आपल्या मुलाला कुणाकडे सोडून जाते, तेव्हा आपल्या कामातून थोडासा वेळ मिळताच ती लगेच फोन करून आपल्या मुलाबद्दल विचारू लागते. तो उठला की अजून झोपलेला आहेस? त्याने काही खाल्ले का? तो खेळत आहे की रडत आहे? आई आपल्या कामादरम्यान सर्व काही विसरते पण आपल्या मुलाला विसरत नाही, परंतु कयामतच्या दिवसाची भयावहता वर्णन करताना म्हटले गेले आहे की त्या दिवशी इतकी भिती निर्माण होईल की मातांनाही आपल्या मुलांचा विसर पडेल.हाच तो न्यायाचा दिवस आहे ज्या दिवशी सर्व माणसांना दूबार जिवंत केले जाईल आणि जन्मभर त्यांनी केलेल्या बऱ्या वाईट कर्मांच्या फाईली निकाली काढण्यात येतील. ज्यामध्ये माणसाने जीवनातील प्रत्येक क्षणी केलेल्या बऱ्या-वाईट कर्मांची नोंद असेल आणि त्यानूसार माणसाला एक तर बक्षीस मिळेल किंवा त्याला शिक्षा भोगावी लागेल, म्हणून लोकहो! कयामतच्या दिवसावर विश्वास ठेवा. त्याच्या भयानकतेचा विचार करा आणि हे समजून घ्या की त्यापासून आपले रक्षण करण्यासाठी एकमेव ईश्वराची भक्ती आणि त्याची आज्ञापालन याशिवाय दुसरा कोणताही पर्याय नाही, म्हणून अल्लाहचे भय बाळगा आणि त्याच्या आज्ञांचे पालन करा.

........................... क्रमशः

- अब्दुल कय्यूम शेख अहमद.

9730254636 - औरंगाबाद.