राज्यपालाच्या मुलाला चाबकाचे फटके!

 न्यायाच्या तेजस्वी घटना

आपल्याला चकित करणारी ही घटना; परंतु त्याचबरोबर सामान्य माणसाचा स्वाभिमान जपणारी आणि त्याला अभिमानाने जगण्याची संधी देणारी आहे.

एका राज्यपालाच्या मुलाला स्वतः राज्यपालांसमोर चाबकाने मारले!! फटके मारणारा व्यक्ती अतिशय सामान्य. फटकेही एक दोन नाही तर मारणाऱ्याचे मन समाधानी होईपर्यंत फटके देण्यात आले. 

इजिप्तमध्ये घडलेली ही सत्य घटना.

त्याचे झाले असे की इजिप्तच्या राज्यपालाच्या मुलाने एका सामान्य इजिप्शियन व्यक्तीबरोबर घोडदौडीची शर्यत लावली. चुरशीची लढत झाली. सामान्य इजिप्शियन हळूहळू आपला घोडा घेऊन राज्यपालाच्या मुलाच्या पुढे निघाला आणि शेवटी त्याने शर्यत जिंकली.

राज्यपाल अम्र बिन आस (रजि.), यांचा मुलगा शर्यत हरला. त्याला ही हार पचवता आली नाही. त्याला खूप राग आला. एका सामान्य इजिप्शियन व्यक्तीने आपल्याला हरवले ही बाब त्याला खूपत होती. त्याने सामान्य इजिप्शियन व्यक्तीला चाबकाने फटके मारायला सुरुवात केली. राज्यपालाच्या मुलाने त्या सामान्य इजिप्शियन व्यक्तीला बेदम मारले.

मारताना तो सांगत होता, ‘मी प्रतिष्ठित कुटुंबातील आहे, तू मला शर्यतीत कसे हरवलेस.’ 

तो सामान्य इजिप्शियन, खलीफा हजरत उमर (रजि.) यांच्या सेवेत हजर झाला आणि म्हणाला, “अमीरुल मोमिनीन! मी अत्याचारापासून तुमच्याकडे आश्रय घेण्यासाठी आलो आहे. माझ्यावर अन्याय झाला आहे, अत्याचार झाला आहे. मला न्याय हवा आहे.”

आदरणीय उमर (रजि.) म्हणाले, “तुला आश्रय देणाऱ्या माणसाचा तू आश्रय घेतला आहेस. तुला निश्चितच न्याय दिला जाईल.”

इजिप्शियन म्हणाला, “मी आदरणीय अम्र बिन आस (रजि.) यांच्या मुलासोबत घोडदौडीची शर्यत लावली होती. मी त्याला मागे टाकले, यावर तो खूप रागावला. त्याने मला चाबकाचे फटके मारायला सुरुवात केली आणि म्हणाला की मी प्रतिष्ठित कुटुंबातील आहे.”

ही तक्रार ऐकून हजरत उमर (रजि.) यांनी इजिप्तचे राज्यपाल अम्र बिन आस (रजि.) यांना पत्र पाठवून आपल्या मुलाला सोबत घेऊन येण्यास सांगितले. अम्र बिन आस (रजि.) आपल्या मुलासह हजर झाले, तेव्हा आदरणीय उमर (रजि.) म्हणाले, “सामान्य इजिप्शियन कुठे आहे?”

त्यालाही समोर हजर करण्यात आले. तो पुढे आला तेव्हा आदरणीय उमर (रजि.) म्हणाले,  “हा चाबूक घ्या आणि तुमच्यावर अत्याचार करणाराला मारा.”

आज्ञा मिळताच सामान्य इजिप्शियन व्यक्तीने राज्यपालाच्या मुलाला त्याच्या समक्ष चाबकाचे फटके मारायला सुरुवात केली. तो मारत असताना आदरणीय उमर (रजि.) म्हणत होते, “प्रतिष्ठित कुटुंबातील मुलाला मारा!”

इजिप्शियन व्यक्तीने आपले मन तृप्त होईपर्यंत फटके मारले. आदरणीय उमर (रजि.) यांनीही त्याला थांबवले नाही.

फटके मारून जेव्हा तो थांबला तेव्हा आदरणीय उमर (रजि.) म्हणाले, “आता या राज्यपालालाही चाबूक लावा.”

इजिप्शियन म्हणाला, “हे खलीफा! त्याच्या मुलाने मला मारहाण केली होती आणि मी त्याचा बदला घेतला आहे. राज्यपालाविरुद्ध माझी कोणतीही तक्रार नाही.”

त्यानंतर अमीरुल मोमिनीन उमर बिन अल-खत्ताब (रजि.) राज्यपालांकडे वळले आणि म्हणाले, “प्रत्येकाच्या आईने त्याला स्वतंत्र जन्म दिला, तुम्ही कधीपासून लोकांना गुलाम केले आहे?”

अम्र बिन आस (रजि.) म्हणाले, “हे अमीरुल मोमिनीन, मला या घटनेची कसलीच कल्पना मिळाली नाही. ती व्यक्तीसुद्धा माझ्याकडे तक्रार घेऊन आली नाही. माझा या प्रकरणाशी काहीही संबंध नाही.”

ही होती आदरणीय उमर (रजि.) यांची न्याय व्यवस्था.

( संदर्भ :- अब्दुल मालिक मुजाहिद लिखित, ‘सुनहरे फैसलें’, पान क्र. ४६)

-सय्यद झाकीर अली

परभणी, 9028065881