आपणच चूक करत होतो

अनेक वेळा असे होते, एखाद्या व्यक्तीने, आपली चूक निदर्शनास आणून दिली तर आपण सहसा आपली चूक मान्य करत नाही, उलट त्या व्यक्तीवर नाराज होतो. त्यातल्यात्यात जर चूक दाखवून देणारा वयाने, पदाने लहान असेल तर अधिकच राग येतो. खरे तर आपण त्या व्यक्तीचे आभार मानले पाहिजे आणि आपली चूक दुरुस्त केली पाहिजे. चूक निदर्शनास आणून देणाऱ्या व्यक्तीनेही अशा पद्धतीने चूक निदर्शनास आणून द्यावी की, समोरच्या व्यक्तीचे मन दुखावले जाणार नाही. या ठिकाणी एक प्रेरणादायी कथा आपल्या वाचनासाठी प्रस्तुत करीत आहे.

एकदा 'फुरात' नदीच्या काठावर एक वृद्ध व्यक्ती वुजू करीत होता. वुजू अर्थात इस्लाममध्ये इबादत करण्यापूर्वी हात पाय धुण्याची विशिष्ट पद्धत. वुजू करून त्याने नमाज पठण करायला सुरुवात केली. आदरणीय हसन (र) आणि हुसैन (र) यांनी त्या वृद्धाला वुजू करताना आणि नमाज पठण करतांना पाहिले. त्यांच्या असे लक्षात आले की, खेडेगावातील या वृद्धाचे वुजू आणि नमाजच्या योग्य पद्धतीकडे दुर्लक्ष होत आहे. आदरणीय हसनैन (हसन आणि हुसैन) (र.) यांना त्या वृद्धाला समजावून सांगायचे होते, पण तो म्हातारा आणि खेडेगावचा माणूस आहे, आपण अजून वयाने लहान आहोत. लहान लहान पोरे आपली चूक दाखवून देत आहेत, हे कदाचित त्याला खपणार नाही. ही आपली निंदा आहे, असे समजून त्याला राग येऊ नये आणि सुधारण्याऐवजी तो तसाच राहील, अशी भीतीही त्यांना वाटत होती. 

काय मार्ग काढावा याविषयी दोघे भावंडे विचार करू लागले. त्यांना एक युक्ती सुचली. दोन्ही भावंडे वृद्ध ग्रामस्थाकडे जाऊन म्हणाले, "बाबाजी, आम्ही अजून किशोर आहोत आणि तुम्ही आम्हाला अनुभवी वाटत आहात. तुम्हाला नक्कीच आमच्यापेक्षा अधिक चांगल्या प्रकारे वुजूची आणि नमाजची पद्धत माहीत आहे. आम्ही दोघे भाऊ वुजू करून नमाज पठण करतो. तुम्ही आमचे निरीक्षण करा."

त्यानंतर हजरत हसनैन (र) यांनी सुन्नतनुसार वुजू केला आणि नंतर नमाज अदा केली. जेव्हा म्हाताऱ्या गावकऱ्याने ते पाहिले तेव्हा त्याला समजले की, त्याची पद्धत चुकीची होती, 'आपणच चूक करत होतो' हे त्याच्या लक्षात आले. त्याने आपल्या चुकीचा पश्चात्ताप केला आणि हजरत हसनैन (र) यांचे आभार मानले.

-सय्यद झाकीर अली

परभणी,

मोबाइल : 9028065881