- सलीम खान, औरंगाबाद
समाजातील तरूणांनी नोकऱ्यांच्या मागे न धावता स्वत:मधील सर्जनशीलता आणि रचनात्मकतेच्या मार्गाचा अवलंब करून स्वत:चे व्यक्तिगत उद्योग व व्यावसायावर भर द्यावा, असा सूर स्टुडंट्स इस्लामिक ऑर्गनायझेशन ऑफ इंडिया (एस.आय.ओ.) दक्षिण महाराष्ट्राच्या वतीने दि. ०८ एप्रिल २०१८ रोजी गोरेगाव येथील सेंट पायस महाविद्यालयात आयोजित एकदिवसीय ‘उद्योजकता प्रशिक्षण परिषदे’त उमटला.
`समाजाला आर्थिकदृष्ट्या सक्षम बनविण्याच्या उद्देशाने गरजेचे आहे की विद्यार्थी आणि युवकांनी केवळ नोकऱ्यांवर आपले लक्ष केंद्रित न करता स्वत:मधील सर्जनशील आणि रचनात्मक कलागुणांचा उपयोग करून खाजगी उद्योगांची सुरूवात करावी. नवीन संकल्पनेवर आधारित खाजगी उद्योगची सुरूवात करणारी मंडळी ही केवळ स्वत:च्या उदरनिर्वाहापुरते मर्यादित न राहता इतर बेरोजगारांना रोजगार उपलब्ध करून देण्यासाठीदेखील साहाय्यभूत ठरतात व समाजाच्या आर्थिक प्रगतीच्या मार्गातदेखील त्यांचे मोलाचे योगदान मिळू शकते. याच पाश्र्वभूमीवर ‘एस.आय.ओ. ऑफ इंडिया’च्या नीतीधोरण कार्यक्रमांतर्गत हा मुद्दा सामील करण्यात आला होता की संघटना ही संघटनेतील सदस्य व समाजातील युवकांसाठी उद्योजकता वाढीसाठी प्रयत्नशील राहील. याच अनुषंगाने एस.आय.ओ. दक्षिण महाराष्ट्राच्या वतीने सदर उद्योजकता प्रशिक्षण परिषदेचे आयोजन करण्यात आले होते. राज्यभरातून जवळपास ८० तरूणांनी या कार्यक्रमाचा लाभ घेतला.
सदर कार्यक्रमाची सुरूवात सकाळी १०:०० वाजता पवित्र कुरआन पठणाने झाली. नंतर संघटनेचे दक्षिण विभागाचे सचिव राफिद शहाब यांनी आपल्या प्रस्ताविक भाषणात सदर कार्यक्रमाची गरज व महत्त्व स्पष्ट केले. त्यानंतर मार्गदर्शन करताना आय.आय.टी. मुंबई येथील मुहम्मद शहाब खान यांनी भारतात मुस्लिम समाजाची आर्थिक आणि व्यवसायिक परिस्थिबद्दल माहिती दिली. आय.आय.एम. अहमदाबाद येथील साहाय्यक प्राध्यापक अबरार अली सय्यद यांनी ‘उद्योजकता संकल्पनेतून प्रात्यक्षिकाकडे' या विषयावर सहभागी उमेदवारांचे सखोल मार्गदर्शन केले. आपल्या भाषणात त्यांनी उद्योजकतेचे महत्त्व स्पष्ट करताना या क्षेत्रातील काही यशस्वी लोकांची उदाहरणे प्रस्तुत केली. ‘रीफा चेंबर ऑफ कॉमर्स अॅण्ड इंडस्ट्रिज’चे संचालक अब्दूस्सलाम यांनी आपले विचार व्यक्त करताना छोट्याछोट्या लघुउद्योगांना चालना देण्यासाठी आर्थिक अनुदान देणाऱ्या शाखा व संस्थांबद्दल माहिती दिली. त्यांनी या क्षेत्रात उपयुक्त ठरणाऱ्या योजना व कार्यक्रमांबद्दलदेखील सविस्तर माहिती दिली.
सदर कार्यक्रमाच्या दुसऱ्या सत्राच्या सुरूवातीला ‘स्टँडर्ड टच ई सोल्युशन’चे संस्थापक हमजा मुअज्जम अली ‘डिजीटल वल्र्ड’सारख्या संकेतस्थळ, ब्लॉग, पेâसबूक, युट्यूब, अॅमेझॉन तसेच फ्लिपकार्डच्या बाबतीत तसेच आधुनिक काळात उपलब्ध असलेल्या व्यवसायाच्या संधीच्या बाबतीत उपयुक्त माहिती दिली. या प्रसंगी दोन यशस्वी उद्योजकांनी उपस्थितांसमोर आपले अनूभव कथन केले. या वेळी लिथोटिक इंजिनीयरर्सचे संस्थापक मिर्झा अफजल बेग यांनी आपल्या प्रोडक्शन कंपनीच्या निर्मितीकार्यात आलेले अनुभव मांडले तर हात (एच ए टी एच) चे संस्थापक हमजा शेख यांनी हातांनी अपंग लोकांसाठी कृत्रिम हातासंबंधी आपल्या इंजिनियरींग प्रोजेक्टच्या बाबतीत सविस्तर अनुभव कथन केले. ई-बे चे क्षेत्रिय प्रबंधक सनीकुमार यांनी आपल्या वस्तू ऑनलाईन कशा विकता येतील याबाबत मार्गदर्शन केले. चार्टर्ड अकाऊंटंट समीर शेख यांनी देशातील जी एस टी सोबतच उद्योग क्षेत्राशी निगडत कायद्यांच्या संदर्भात माहिती दिली. शेवटी जमाअत ए इस्लामी हिंद महाराष्ट्रचे अध्यक्ष तसेच ‘रीफा चेंबर ऑफ कॉमर्स अॅण्ड इंडस्ट्रिज’चे चेअरमन तौफीक अस्लम खान यांच्या मार्गदर्शनाने कार्यक्रमाची सांगता झाली.
Post a Comment