प्रेषित मुहम्मद (स.) म्हणतात, ‘‘अल्लाह म्हणतो, माणूस आपल्या पुण्य कर्मांद्वारे माझ्याशी सतत जवळीक साधत असतो. आणि मग मी त्याचे डोळे, त्याचे कान आणि हात व पाय बनतो. ज्याद्वारे तो पाहतो, ऐकतो आणि धरतो व चालतो. त्याने माझ्याकडे (जे काही) मागितले तर मी ते जरूर देईन. अल्लाहचे हक्क अदा करीत राहिले आणि मर्यादांचे उल्लंघन केले नाही तर तो तुम्हाला तुमच्या समक्ष दिसेल. प्रत्येक स्थितीत तो तुमच्या जवळ असेल. तुम्हाला मदत करीहल, तसेच तुमचे रक्षण करत राहील.’’
प्रेषित (स.) म्हणतात, ‘‘तुम्ही भरभराटीच्या दिवसांमध्ये अल्लाहशी ओळख केली तर तो बिकट परिस्थितीत तुम्हाला ओळखेल.’’
‘‘अल्लाह म्हणतो, कुणी मला साद घालणारा आहे, मी त्याला प्रतिसाद देईन. कुणी माझ्याकडे काही मागणारा आहे, मी त्याच्या मागण्या पूर्ण करीन. कुणी माझ्याकडे क्षमायाचना करणारा आहे, मी त्याला क्षमा करीन.’’
‘‘अल्लाहकडे सतत मागत राहणे, आपल्या गरजा त्याच्याकडे मांडणे हे त्याला पसंत आहे. जो व्यक्ती अल्लाहकडे मागत नाही, त्याच्यावर अल्लाह नाराज होतो. अल्लाहपाशी तमाम निर्मितीला देण्यासाठी इतके उदंड आहे की त्याने कितीही दिले तरी त्याच्याकडे कशाचीच कमतरता राहणार नाही.’’
प्रेषित (स.) म्हणतात, ‘‘जे काही तुम्हाला फायदा पोहचवू शकते त्याची इच्छा करा, त्याच्यासाठी प्रयत्न करत राहा. अल्लाकडे मगत मागा. उदासीनता बाळगू नका, कारण जर कुणी अल्लाहशिवाय इतर कुणाकडे मदत मागितली तर अल्लाह अशा व्यक्तीला त्याच्याच हवाली करतो. प्रत्येक गोष्टीची एक वास्तविकता असते. जे काही एखाद्याला प्राप्त झालेले आहे ते त्याला मिळणारच होते. आणि जे काही त्याला मिळाले नाही ते त्याला मिळणारच नव्हते. ही वास्तविकता जोपर्यंत माणसाला समजत नाही तोपर्यंत तो श्रद्धावंत होऊ शकत नाही.’’
प्रेषित (स.) यांचे विधान आहे की, ‘‘अल्लाह जेव्हा काही लोक समूहांना पसंत करतो तेव्हा त्यांची परीक्षा घेतो. जे लोक (अल्लाहच्या निर्णयाशी) राजी असतात अल्लाह देखील अशा लोकांशी राजी होतो. आणि जे लोक अल्लाहच्या निर्णयाशी नाराज असतात अल्लाहदेखील अशा लोकांशी नाराज होतो.’’ (ह. अनस, तिर्मिजी)
प्रेषित (स.) म्हणतात, ‘‘अल्लाह श्रद्धावंताविषयी जो काही निर्णय घेतो त्या निर्णयामागे श्रद्धावंताची भलाई असते. त्याला अल्हाददायक प्रसंग आल्यावर जर तो अल्लाहकडे कृतज्ञता व्यक्त करतो त्याच्यामध्ये त्याचे भले असते आणि जर त्याला काही यातना पोहोचतात तरीदेखील तो संयमाने त्या सहन करत असेल तरीदेखील अल्लाह त्याचे भले करतो.’’ (गंजीन-ए-हिकमत)
संकलन : सय्यद इफ्तिखार अहमद
Post a Comment