मौ. मौदूदी यांच्या ‘व्याज’ या पुस्तकाद्वारे खऱ्या अर्थाने ‘इस्लामी अर्थव्यवस्थेचा’ साक्षात्कार झाला.

‘खिलाफत’ इस्लामी लोकशाही? हे निसार मोमीन यांचे मनोगत वाचनात आले. मी अनेक वर्षे आखाती राष्ट्रांत अभियंता म्हणून कार्यरत होतो. तेथे आखातातील वेगवेगळ्या देशांतील मित्रांशी नेहमी संवाद असायचा. मुळात आखाती राष्ट्रांतील लोकांना भारतातील लोकशाही, व्यक्तिस्वातंत्र्य, वर्तमानपत्राच्या स्वातंत्र्याचा हेवा वाटतो. जगाला आणि खुद्द इस्लामधर्मीयांना खिलाफतीबद्दल माहिती तरी काय आहे? शिवाय चोरांचे हात कलम करणे आणि व्यभिचाऱ्यांना ठेचून मारण्यापलीकडे!
माझ्या एका कुवैती सहकाऱ्याने मला मौ. सय्यद अबूल आला मौदूदी यांची इंग्रजी भाषांतरित ‘व्याज’ या पुस्तकाची प्रत दिली तेव्हा मला खऱ्या अर्थाने ‘इस्लामी अर्थिव्यवस्थे’चा साक्षात्कार झाला. परंतु विडंबना अशी की जगात कोठेही अशी शासन व्यवस्था संपूर्णत: अस्तित्वात नाही. कोणत्याही भूमिगत चळवळ आणि रक्तरंजित क्रांतीपेक्षा लोकशाही शासन व्यवस्था ही कधीही लोकहिताची आहे. साम्यवादी राष्ट्रेसुद्धा अध्यक्ष निवडींना लोकशाही मार्गाचा अवलंब करून संभाव्य संघर्ष टाळतात. लोकशाहीत संविधान लवचिक असते. लोकांना आपली अर्थव्यवस्था, परराष्ट्र धोरण, दिवाणी, फौजदारी कायदा व्यवस्था कुरआन आणि प्रेषितवाणीनुसार करावयाचे असल्यास लोकशाहीत शक्य आहे. परंतु अमेरिका आणि यूरोपीय राष्ट्रे लोकशाहीचे कितीही समर्थक असले तरी आपल्या स्वार्थासाठी अरब राष्ट्रांत लोकशाही रुजवण्यासाठी स्वारस्य दाखवत नाहीत. उलट इजिप्तसारखा गेल्या पन्नास-साठ वर्षांपासून हुकूमशाही-लष्करशाहीने पिंजलेल्या राष्ट्रातील लोकांनी कशीबशी स्थापन केलेलेल्या लोकनियुक्त सरकारचे उच्चाटन करण्यात कोणतीही कसर सोडली नाही.
- विलास पावडे, पिंपरी, पुणे.