डोळ्यांचं पारणं फेडणारं नियोजन...

औरंगाबाद जिल्ह्यातील लिंबे जळगाव येथे पार पडलेल्या मुस्लिम बांधवांच्या इज्तेमा या राष्ट्रीय धार्मिक कार्यक्रमाचे नियोजन व शिस्त बघून डोळे थक्क झालेत! तुम्हाला विचार पडेल की ‘मी जैन धर्मीय असून’ का इतवंâ कौतुक करतोय मुस्लिम धर्मीय कार्यक्रमचें...! मी ‘जैन होण्याआधी भारतीय’ नागरिक आहे आणि एक माणूस आहे... सुमारे ८० लाख लोकांचे ३ दिवसांचे नियोजन म्हणजे सोपे काम नाही... आपल्याकडे साधी यात्रा असो व घरगुती कार्यक्रम ८००-१००० लोकांचे नियोजन करायचे तर नाकीनऊ येत. ९० लाख चौ. फुटांचा मंडप एकाच वेळी एकाच ठिकाणी हे पहिल्यांदाच घडत असेल. ५ किलोमीटरपर्यंत मंडप किमान ३५०० ते ४००० एकर जागेत होते, (त्यासाठी ‘मोठया संख्येने हिंदू बांधवांनी आपले उभे पीक स्वत:च्या हाताने नष्ट केले.) नियोजनबद्ध पार्किंग तेपण जिल्यानिहाय, कुठलाही गोंधळ नाही, ‘२५००० पाण्याचे नळ,’  ‘१५,००० शौचालये.’ किमान ‘५०,००० शिस्तबद्ध स्वयंसेवक’ स्वयंशिस्तीने १२ तासाच्या सेवा देतात. नंतर १२ तास दुसरे स्वयंसेवक... सर्वांच्या आंघोळीचे, जेवणाचे, मुक्कामाचे अप्रतिम नियोजन... तेथे येणाऱ्या प्रत्येक व्यक्तीसाठी रस्त्यात जागोजागी जेवणाची, पाण्याची, थांबण्याची व्यवस्था, स्पष्ट दिशादर्शक फलक, रस्त्यात गाडी खराब झाली पंचर झाली तरी सर्व व्यवस्था, त्यांचे मोबाइल नंबर, पार्किंग झोन प्रत्येकाजवळ आधीच उपलब्ध. हे सगळं नियोजन गेले ६ महिन्यांपासून चाललेलं... २५,००० समाजबांधव गेले कित्येक महिने येथे राबत आहेत... हा मास्टर प्लॅन ज्याने कोणी आखला त्या महान व्यक्तीला व त्याला सुंदर शांत पद्धतीने साथ देणाऱ्या धर्म अनुयायी ना माझा सलाम... विशेष म्हणजे जेव्हा मी तिथं पोहचलो सगळं बघितलं, बऱ्याच लोकांशी चर्चा केली, कुणाच्याही बोलण्यात चर्चेत कुणावर उपकार करत असल्याचा अविर्भाव नव्हता. सगळ्यांत महत्त्वाचे कुठंही कुणाचेही हार्दिक शुभेच्छा किंवा स्वागताचे फोटो बॅनर लावलेल दिसले नाही... मला मिळालेल्या माहितीनुसार शासनाचा कुठलाही निधी, पैसे, यंत्रणेवर अधिभार न देता... इतर वाहतुकीला त्रास होणार नाही, इतर समाजाला त्रास होणार नाही याची काळजी घेत पार पडणाऱ्या कार्यक्रमाचे कौतुक करावे तितके थोडेच! प्रत्येक धर्म आपल्या आपल्या परीने आपल्या धर्माचे कार्यक्रम पार पाडत असतात पण या कार्यक्रमाचे नियोजन अफलातून आहे. जे योग्य असतं आणि मनाला आवडतं त्याचं कौतुक मी नेहमीच भरभरून करत असतो. शिस्त आणि नियोजन मनापासून आवडलं... इतका मोठा कार्यक्रम आजवर मी कधीही पाहिला नाही. म्हणून हे कौतुक... नियोजनाची आवड आहे म्हणून बघायला गेलो होतो....               -अलकेश कासलीवाल, येवला.