Halloween Costume ideas 2015

बाह्य कचऱ्याच्या आधी आंतरिक अशुद्ध विचारांची स्वच्छता अत्यंत आवश्यक

नेशनल क्लिनलीनेस डे विशेष - ३० जनवरी


दरवर्षी राष्ट्रपिता महात्मा गांधी यांच्या पुण्यतिथी निमित्त ३० जानेवारी हा दिवस "नेशनल क्लीनीनेस डे" म्हणून साजरा करून खर्‍या अर्थाने त्यांना आदरांजली वाहिली जाते, कारण गांधीजींनी त्यांच्या विचारांत आणि कार्यात स्वच्छतेला विशेष स्थान दिले होते, त्यांचे विचार आणि स्वच्छतेचे महत्व समजून प्रत्येकाने हे सदगुण आपल्या जीवनात आत्मसात केले पाहिजेत. स्वच्छ वातावरण प्रत्येकासाठी आनंददायी असते. पर्यावरण स्वच्छ व निरोगी ठेवणे हे आपल्या सर्वांचे कर्तव्य आहे. हा दिवस घरामध्ये-घराबाहेर, कामाची ठिकाणे, गल्ल्या/रस्ते आणि सार्वजनिक ठिकाणी स्वच्छतेच्या उच्च मानकांचे पालन करण्याचे आवाहन करतो. स्वच्छता राखणे हा निरोगी जीवनाचा अत्यावश्यक भाग आहे, त्याचप्रमाणे स्वच्छता आणि सफाई ही आपल्या दैनंदिन जीवनात महत्त्वाची भूमिका बजावते. कुटुंबातील ज्येष्ठांनी मुलांना आपले वातावरण स्वच्छ ठेवण्याची गरज शिकवली पाहिजे. प्रदूषण आणि अस्वच्छतेच्या घातक धोक्याबद्दल लोकांचे अज्ञान त्यांना वेदनादायक मृत्यूच्या उंबरठ्यावर आणते. 

जेव्हा स्वच्छतेचा प्रश्न येतो तेव्हा माणूस फक्त स्वतःचा विचार करतो समाजाप्रती असलेल्या कर्तव्याचा नाही. लोक नेहमी सर्वत्र अस्वच्छता पसरवताना दिसतात. घाणीमुळे डास, माश्या, कीटक, विषाणू निर्माण होतात व पर्यावरण प्रदूषित होऊन रोगराई पसरते. आपण ज्या वातावरणात राहतो तेच वातावरण आपण गलिच्छ बनवीत आहोत, ही सर्वांसाठी शरमेची बाब आहे. विकसित देशांमध्ये स्वच्छतेवर विशेष भर दिला जातो, स्वच्छतेशी संबंधित समस्येसाठी जबाबदार व्यक्तीला तुरुंगवास आणि मोठ्या प्रमाणात दंडाची शिक्षाही दिली जाते. जेव्हा परदेशात स्वच्छताविषयक कायदे कडक असतात तेव्हाच तेथील परिसर इतका सुंदर, स्वच्छ आणि प्रगतीशील दिसतो कारण कायदे शिस्तबद्ध पद्धतीने पाळले जातात. 

आपल्या देशात स्वच्छतेबाबत जागरुकता नसल्यामुळे अनेक निसर्गरम्य ठिकाणे, नद्या, तलाव, समुद्रकिनारे, ऐतिहासिक वास्तू, किल्ले, पर्यटन व धार्मिक स्थळे इत्यादी ठिकाणी मोठ्या प्रमाणात घाण आणि कचरा दिसून येतो. शहरात कुठेही उघड्यावर कचरा जाळणे हा कायदेशीर गुन्हा आहे, कचरा जाळल्याने वातावरणात विषारी वायू पसरतो, तरीही अनेकजण उघड्यावर कचरा जाळतात. लोकांना ना सरकारची भीती ना समाजाची, प्रत्येकजण आपापल्या स्वार्थाचा परीने जगतो. शहरातील सोसायट्यांभोवती, मोकळ्या जमिनीवर किंवा रस्त्याच्या कडेला अनेकदा कचऱ्याचे मोठे ढीग दिसतात. काही ठिकाणी लोक कसलीही काळजी न घेता थेट फ्लॅट किंवा इमारतीच्या बाल्कनीतून कचरा खाली फेकतात. इतर लोक देखील एकमेकांकडे पाहून त्या असभ्य वर्तनाची कॉपी करतात. लोक फक्त स्वतःची आणि घराची स्वच्छता ठेवतात पण त्यांच्या वाईट वागण्याने समाजाचे किती नुकसान होते ह्या बद्दल कधीच विचार करीत नाही, हा त्यांच्या अशुद्ध विचारांचा दोष आहे. आपले घर, परिसर, गाव, शहर, राज्य, देश हे सर्व एक असून या सर्वांचा विचार करत स्वच्छतेचा संकल्प घेणे सर्वात महत्त्वाचे आहे. 

समाजातील कचऱ्याची योग्य विल्हेवाट लावायची असेल, तर त्यात लोकसहभाग खूप महत्त्वाचा आहे. लोकसहभाग तेव्हाच साध्य होऊ शकतो, जेव्हा लोक तयार होतील आणि आपली जबाबदारी समजून घेतील, त्यासाठी त्यांची मानसिकता बदलणे आवश्यक आहे, अर्थातच समाजाच्या शुद्धीकरण याबरोबरच लोकांचे विचारही शुद्ध झाले पाहिजेत, हा स्वच्छतेचा महत्त्वाचा भाग आहे. परोपकाराच्या भावनेने निस्वार्थीपणे कोणाची तरी मदत करणे, कोणाच्या दु:खात सहभागी होणे, रडणाऱ्या चेहऱ्यावर हसू आणणे, त्यातून मिळणारा आनंद आणि समाधान हे वेगळेच असते, जे आपण कुठूनही विकत घेऊ शकत नाही. बाह्य कचरा मानवी आरोग्यास आज़ार देतो परंतु अंतर्गत मानवी कचरा मानसिक विकारांना जन्म देतो आणि त्याचे खूप गंभीर परिणाम होतात, एखाद्याच्या चुकीने संपूर्ण मानवी समाजावर परिणाम होतो. अशुद्ध विचारांमुळे शंका, स्वार्थ, अपराधीपणा, न्यूनगंड, लोभ, भेदभाव, घाणेरडे विचार, इतरांमध्ये दोष शोधणे, घमंड, अहंकार, भांडखोरपणा यांसारखे वाईट गोष्टी मानसिक विकार निर्माण करतात. द्वेष, राग, मत्सर, दुराचार हे माणसाला रानटी प्राण्यासारखे बनवतात. मन आणि मेंदूमध्ये पसरलेली घाण चुकीच्या कृत्यांना प्रोत्साहन देऊन समाजातील समस्या वाढवते, माणसाचे चारित्र्य आणि वागणूक हे त्याच्या विचारांचे फलित असते. आपल्या मनातून असा घाण अशुद्ध विचारांचा कचरा काढून टाकला तर आपोआपच समाजातील आपल्या कर्तव्याची जाणीव होऊल आणि आपण आपल्या चांगल्या वर्तनाने सामाजिक जबाबदाऱ्या पार पाडत समाजातील कचऱ्याची समस्या दूर करून मोठी कामगिरी करू शकू आणि सर्वत्र स्वच्छ, निरोगी वातावरण व आनंददायी विकास होईल. 

- डॉ. प्रितम भि. गेडाम

मोबाइल नं. ८२३७४ १७०४१


Post a Comment

statcounter

MKRdezign

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget